चिलबल/ Chilbal

Description

आनंद पवार यांचे ‘चिलबल’ हे पहिलं पुष्प ललितगद्य स्वरूपात येत आहे. आनंद पवार हा मूळात संवेदनशील आणि हळव्या मनाचा भला माणूस आहे. त्याचे हे हळवेपण ‘चिलबल च्या रूपाने आलं आहे. नकळत्या वयात त्याच्या जीवनात पोरकेपण आणि परकेपण आलं. पोटासाठी संघर्ष सुरू झाला. भाकरी, पोट आणि जगणं एकीकडे आणि माणूस, निसर्ग, गुरं-ढोरं, गावशिवार दुसरीकडं असं जगणं सुरू झालं, या जगण्यातून आनंद पवार यांनी माणूसपणाचा शोध घेतला. त्यांच्या बालपणीच्या आठवणी, त्या आठवर्णीची साठवण म्हणजेच ‘चिलबल’. तुटलेलं नव्यानं जोडणं म्हणजेच ‘चिलबल’, मोडून पडलो, संपलो असे न म्हणता स्वतःला सावरून नव्याने उभं राहाणे म्हणजेच ‘चिलबल’.

विझत आणि पुसत चाललेल्या ग्रामसंस्कृतीचा ओलावा त्यांच्या लेखणीतून नवा आयाम उभा करतो आहे. आँध जि. सातारा या परिसरातील प्रादेशिक भाषेचा वापर त्यांनी केला आहे. या भाषेला मूळातच एक लय आणि गोडवा आहे, त्याच बरोबर विनम्रता देखील शब्दांशब्दातून पाझरताना आढळते.